RIP MSV Sir – ஒரு புல்லாங்குழல் ஊமையானது

காலையில் தொலைக்காட்சிச் செய்தியில் பார்த்த முதல் தகவல். மெல்லிசை மன்னர் காலமானார். சென்ற ஒரு வருடத்தில் சில மரணங்கள் என்னை மிகவும் பாதித்தது. பாலு மகேந்திரா, கே பாலசந்தர், ஜெயகாந்தன் போன்ற ஆளுமைகள். இந்த ஆளுமைகள் தமிழ்நாட்டை தங்கள் துறைகளில் ஆண்ட பொழுது ஜொலித்த பொழுது நான் பிறந்திருக்கக் கூட இல்லை. ஜெயகாந்தன் அவர்கள் எழுத்துகள் எல்லாம் என் வயதை விட மூத்தவை. இந்த பல்வித்தக நாயகர்களுக்கு எல்லாம் மூத்தவர் MSV.

MSV

தமிழக அரசால் “திரை இசைச் சக்கரவர்த்தி” என விருது அளித்து பாராட்டப்பட்டவர். பல விருதுகள் பட்டங்கள் பெற்றாலும் மக்கள் என்றும் மெல்லிசை என்றால் விஸ்வநாதன் என்ற இணைப்புப் சொல்தான் MSV அவர்களின் மிகப் பெரிய வெற்றி….”மெல்லிசை மன்னர்” என்ற நீங்காப் புகழுக்குச் சொந்தக்காரர்.  “மெல்லிசை மன்னர்” என்ற பட்டத்தை அவருக்கு வழங்கியவர் சிவாஜி அவர்கள். கண்ணதாசன் மீது தீராத பாசமும் நேசமும் கொண்டவர். அவர்களது “அண்ணன் தம்பி” பாசம் உலகறிந்தது. இசையில் பாடல்களின் வார்த்தையை ஆக்கிரமிப்பு செய்த  MSV அவர்களின் நேர்த்தி பெயர்கொண்டது.

பாசமும் நேசமும் புகழும் பதவியும் மகிழ்ச்சியும் துக்கமும் நெகிழ்ச்சியும் துறவும்….எந்த மனநிலையிலும் கேட்க ஒரு பாடலேனும் கொடுத்தவர் MSV. உங்கள் அனுபவத்தில் பாதி வயது கூட இல்லாத எனக்கும் பாடல் தந்தவர் நீங்கள். உங்கள் அண்ணன் கண்ணதாசனுடன் நீங்காப் புகழ் பெற்ற நீங்கள், மீண்டும் வானுலகில் இசையாய் வாழ்வீர்கள் என்பது திண்ணம்.

நீ நிரந்தரமானவன் அழிவதில்லை……இந்தப் புல்லாங்குழல் ஊமையாகலாம்….ஆனால் அது தந்த இசை காற்றில் இருந்து மணம் பரப்பும்.

Leave a Reply

Your email address will not be published. Required fields are marked *